Txuleta gehiago

Gaizka Lasa
GAIZKA LASA

Arrazoi izango dute azkenean gure aiton-amonek. Jan egin behar da. Aukeran, asko. Gure kulturaren arabera, gehiago jateak osasuna eta zoriona dakar. Badaezpada ere, jan. Itxura sendoa eta biribila pertsona sanoarekin lotzen da. Eta alderantziz. Meheari beti zerbait falta zaiola uste izaten da: indarra, fundamentua, sendotasuna ala dena delakoa. Hori da gure arbasoen pentsamoldea. Eta ez dakit ez ote duten arrazoi pixka bat. Gure jokalariak oso argal ikusten ditut. Telebistan ez du ematen, telebistak loditu egiten duelako (hori ere mitoa baina zerbait gehiago da), baina aurrez aurre izan ditut azken egunotan eta fin-finak daude. Beraz, eta garaian gaudenez, nik bakailao tortilla eta txuleta jatera gonbidatuko nituzke mutilak sagardotegira. Beldurrik gabe, asetu arte. Euren gorputzek eskertuko lukete eta, batek daki, agian baita euren zango hauskor horiek ere. Hamasei lesio izan ditu taldeak denboraldi honetan. Imanolek egur gehiegi sartzen diela izango da? Kasualitatea? Edo gure aiton-amonek arrazoi dutela. Txuleta gehiago behar dutela alegia, egundo dieta zorrotz horiek alde batera utzita. Eta bide batez sagardo pixka bat, bizigarri moduan, animoso egoteko eta ez triste (hori ere kultura da). Zubietan gosaldu eta bazkaltzen dute egunero, baita bertako taperra etxeko afarian batek baino gehiagok. Dena neurtuta. Tamainan. Eraman ditzatela sagardotegira!