Illarramendi: «Azken gola afizioak sartu behar du»

Mutrikuarrak gau historiko bat posible ikusten du. «Guk sinesten dugu eta hori da lehenengo pausoa. Denon indarra behar dugu. Han, Erroman, bizitakoa orain hemen beraiek bizitzea nahi dugu. Zaleen indarra beharrezkoa izango da. Partida hasi baino lehen hasi behar gara markagailua iraultzean pentsatzen. Badakigu gurekin egongo direla zaleak eta berotasuna emango digutela. Azken gola beraiek sartu behar dute».

Hala ere, eskarmentu handiko jokalaria izanik, Illarramendik badaki ezin dela helburua minutu gutxi batzuetan lortu. «Burua hotz eduki behar da nahiz eta bihotza topera izan. Partidak 90 minutu izango ditu. Han ere nahiz eta lehenengo minututan gola jaso gauza asko egin genituen ondo. Ez genuen asmatu eta bigarren golarekin maldan gora jarri zaigu kanporaketa, baina partido osoan zehar gauza asko egin genituen ondo eta mina eman genien».

Errromakoaren ondoren, Imanolek halako partidak taldeari handi geratzen zaizkiola esan bazuen ere, Illarramendiren arabera «entrenatzaileak ez du hori pentsatzen. Berak ere sinesten du iraultzan. Egun hartan denak ginen gure onetik aterata, baina Imanolek beti sinistu izan du eta buruan sartu digu gai garela».

Burumakur dagoen zaleari ere helarazi dio mezua. «Arrazoi asko eman ditugu guregan sinisteko. Beste behin gure ehuneko ehuna emango dugu. Azkenean, denon artean lortuko dugu»