Real Sociedad - Barcelona Betiko koskan estropezu

Olatz Elosegi
OLATZ ELOSEGI
1

Marka asko hautsi ditu Imanolek baina honekin ezin

Titulu bat, Europarako sailkapenak, oroimenerako partidak... asko lortzen ari da oriotarra lehen taldean. Erronka batekin ezin du ordea. Zortzi porrot Barçaren aurka jokaturiko hamar partidatan.

2

Gol eder bat baino gehiago

Emaitzaz haratago Isaken golak bi irakurketa positibo utzi zizkigun. Bat: Barçaren lehen golak ez zion besteetan bezainbesteko mina egin taldeari (gero gerokoak). Bi: suediarrak mira zuzendu duela dirudi. Golak antsietatea murrizteko balioko dio.

3

Kanarietako magia zelai erdian

Bata bere ibilbidearen amaieran dago; besteak lehen urratsak baino ez ditu egin, baina baloiarekin harreman berezi bera dute biek ere. Silvak eta Pedrik eskaintzen duten ikuskizunak merezi du bai sarrera ordaintzea.

4

Iritsi berrien ekarpen ezberdina

Denboraldia luzea da oraindik baina lehen bi partidetan Kubok detaile ugari utzi dizkigu, taldeari eman diezaiokeena asko dela erakutsiz. Braisek, aldiz, atzokoa baino bertsio hobea eman beharko du. Motel ibili zen.

5

Martínez Valero ez da leku txarra puntu bila joateko

Elche lehen mailara itzuli zenetik ez zaio gaizki joan taldeari hara egindako bisitetan, bietan ere garaipena erdietsi baitu. Garrantzitsua litzateke larunbatean hiru puntu batzeko aukera probestea.