Amen, zu hor ta ni hemen!

Gaizka Lasa
GAIZKA LASA

Langilearen egunean lanik egin gabe geratuko da Silva, ustez epailea «a la mierda» bidaltzeagatik. Barkatu erderakada, baina «pikutara» bidaltzea ez da gauza bera. Ezer egin ez duela pentsatuko du jokalari kanariarrak. «Pekatu arina norberak egina», dio esaerak. Beste atsotitz batzuk ere ezagutu beharko lituzke honezkero hain ibilbide luzea duen magoak. «Ez gehiegi hitz egin, nahi ez bada huts egin», «Isilik oiloak pixa egin arte!» edota «Aditu nahi ez duenak, ez du esan behar». Kontuak kontu, bi partidako zigorra jaso zuen eta bihar ere ez da zelaian egongo, Bartzelonaren aurka egon ez zen bezala. Epaileek berriz ere realzaleon beroaldia eragingo dutela ziur naiz, jokalarien iruzur lotsagabea lagun. Baina txilibitoa ahoan duen horren aurrean jokabide bakarrak balio du, «Amen, zu hor ta ni hemen», Realeko jokalaririk ez baita, nik dakidala, Federazioko lehendakariarekin negozioak dituenik.

Hori esanda, arauak ematen du hausnarketarako. Epaile jaunari «mespretxu» egiteagatik zigortu dute Silva. Bihotzen taupada sarri-sarri dagoenean, eta helburu potoloa jokoan izanda, epaileari antzarak ferratzera bidaltzea hain larritzat jotzea ez al zaizue deigarria egiten errespetu faltaz lepo dagoen futbol munduan? Neurrigabea berez neurriz kanpo dabilen sektorean. Diru mordoaren truke berdegunean bere abilezia erakustea beste zereginik ez duen futbolari profesional bati zer eta jokatu gabe uztea harrigarria da. Edo izan beharko luke. Isun ekonomikoa ez al da nahikoa? 200.000 eurokoa izan behar badu ere. Baina bere ogibidea jorratu gabe uztea? Langilearen egunean gainera?

Esfortzu ekonomiko itzela egiten duen klub bat zigortzea da hori, baita ederki kostata sarrera erosten duen zalea ere. Kirol irizpideekin zerikusirik ez duen zerbaitegatik lehiaketa baldintzatzea ere bada. Tira, hurrengoan hobe isilik geratu.